Islamic Question and Answer

سوال:۔رضا کسے کہتے ہیں؟

جواب:۔اللہ کے فیصلوں (قضاء) پر اعتراض نہ کرنا زبان سے نہ دل سے رضا کہلاتا ہے۔

سوال:۔رضا کیسے حاصل ہوتی ہے؟

جواب:۔ہمیشہ ہر حال میں یہ سوچنا کہ اللہ تعالیٰ کی طرف سے جو چھ پیش آتا ہے اس میں بندے کا ہی فائدہ ہے چاہے اس فائدہ کی حقیقت بندے کومعلوم ہو یا نہ ہو اور شکایت و حکایت سے پرہیز کرنا رضا حاصل کرنے کا طریقہ ہے۔

سوال:۔زہد کسے کہتے ہیں؟

جواب:۔دنیا کی رغبت کو چھوڑکر آخرت کی طرف متوجہ ہونا زہد ہے۔

سوال:۔زہد کا کیا حکم ہے؟

جواب:۔فکرِ آخرت اور ایمان کی حفاظت کے لئے زہد امر ضروری ہے۔ رسول اکرم ا فرماتے ہیں جو شخص صبح اٹھتے ہی دنیا کی فکر میں لگ جاتا ہے اللہ تعالیٰ اس کا دل پریشان کردیتے ہیں، اور اس کو ملتا اسی قدر ہے جتنا اس کی تقدیر میں لکھا جاچکا ہے اور جو شخص صبح اٹھتے ہی آخرت کی فکر میں لگتا ہے اللہ تعالیٰ اس کا دل مطمئن رکھتے ہیں اور اس کی دنیا کی خود حفاظت و کفالت فرماتے ہیں اور اس نیک بندے کا دل بے نیاز کردیتے ہیں اور اتنی دنیا دیتے ہیں کہ یہ اس سے منہ پھیرتا ہے اور دنیا اس کے پیچھے پیچھے چلی آتی ہے۔

سوال:۔زہد کا کیا فائدہ ہے؟

جواب:۔زہد سے دل میں ایک نور اور بصیرت پیدا ہوتی ہے، رسول اکرم ا فرماتے ہیں جس کو اللہ تعالیٰ ’’زاہد‘‘ بنادیتے ہیں اس کے دل میں ’’حکمت‘‘ عطا فرماتے ہیں اور اس کو دنیا کی بیماری اور علاج سے آگاہ کردیتے ہیں۔

سوال:۔زہد کیسے پیدا ہوتا ہے؟

جواب:۔دنیا کے عیبوں اور مضرتوں کو جاننے اور اس کے فنا ہونے کوسوچنے اور آخرت کی لازوال نعمتوں اور فائدوں کو یاد رکھنے سے زہد پیدا ہوتا ہے۔

سوال:۔صبر کسے کہتے ہیں؟

جواب:۔ناگوار بات پر نفس کو جمانا، اس کو سہہ لینا اور آپے سے باہر نہ ہونا اوربرداشت کرلینا صبر ہے۔

سوال:۔صبر کا کیا حکم ہے؟

جواب:۔صبر ایمان کا ایک اہم تقاضہ ہے، رسول اکرم ﷺ کا ارشاد ہے صبر آدھا ایمان ہے، اللہ تعالیٰ فرماتے ہیں، اے ایمان والو! صبر اور نماز سے سہارا حاصل کرو، صبر کی اہمیت اس سے بھی واضح ہوسکتی ہے کہ قرآن میں اس کاذکر ستر (۷۰) سے زائد مرتبہ آیا ہے۔

سوال:۔صبر کی فضیلت کیا ہے؟

جواب:۔صبر کے بارے میں رسول اکرم ﷺ کا ارشاد ہے کہ صبرجنت کے خزانوں میں سے ایک خزانہ ہے، جس شخص کو یہ فضیلت حاصل ہوگئی وہ بڑا خوش نصیب ہے شب بیدار اور صائم الدھر سے اس کا درجہ افضل ہے، اللہ تعالیٰ صبر کرنے والوں کے ساتھ ہوتے ہیں اور ان کا ساتھ دیتے ہیں (اِنَّ اﷲَ مَعَ الصَّابِرِینَ) اللہ کی ساتھ داری صبر کی سب سے بڑی فضیلت ہے۔

سوال:۔صبر کرنے کا طریقہ کیا ہے؟

جواب:۔صبر کرنے کا طریقہ یہ ہے کہ اپنی خواہشات اور نفسانی جذبات کے خلاف چلے جس سے نفسانی خواہشات اور جذبات کمزور ہونگے اور جو کچھ خلاف طبیعت درپیش ہو اس کے بارے میں کوئی شکایت نہ کرے اور یہ سمجھے کہ اللہ تعالیٰ نے اس میں میرے لئے کوئی مصلحت رکھی ہے اور اگر کوئی حکم ہو تو اس پر مضبوطی سے قائم رہے، مصیبت ہو تو اس کو ہمت سے سہہ لے اور پریشان نہ ہو۔

سوال:۔شکر کیا ہے؟

جواب:۔جو کچھ طبیعت کے موافق حاصل ہو اس کو اللہ کی نعمت سمجھنا، اس پر خوش ہونا اس کو اپنی حیثیت سے زیادہ جاننا زبان سے اللہ کی تعریف بیان کرنا اور اس نعمت کو صحیح استعمال کرنا شکر ہے۔

سوال:۔شکر کیا حکم ہے؟

جواب:۔شکر ایمان کا تقاضا ہے اور ناشکری کفر ہے اللہ تعالیٰ کا ارشاد ہے کہ میرا شکر بجالاؤ اور میری ناشکری نہ کرو۔

سوال:۔شکر کا کیا فائدہ ہے؟

جواب:۔شکر کا فائدہ یہ ہے کہ اس سے اللہ کی محبت پیدا ہوتی ہے اور اللہ شکر کرنے والے کو خوب نوازتا ہے اور مزید نعمتیں دیتا ہے۔ رسول اکرم ﷺ کا ارشاد ہے، چار چیزیں ایسی ہیں کہ وہ جس کو مل گئیں اس کو دنیا و آخرت کی بھلائیاں حاصل ہوگئیں (۱)شکر کرنے والا دل (۲) ذکر کرنے والی زبان (۳) مصیبتوں پر صبر کرنے والا جسم (۴)اور اپنی ذات اور شوہر کے مال میں خیانت نہ کرنے والی بیوی۔

سوال:۔شکر پیدا کرنے کا طریقہ کیا ہے؟

جواب:۔شکر پیدا کرنے کا طریقہ یہ ہے کہ اللہ تعالیٰ کی نعمتوں کو بار بار سوچا اور یاد کیا جائے اور ہر نعمت کو اس کی طرف سے سمجھاجائے اس سے رفتہ رفتہ محبت پیدا ہوگی اور محبت سے مقام شکر حاصل ہوگا۔

سوال:۔تفویض کیا ہے؟

جواب:۔اپنے لئے کوئی حالت تجویز نہ کرنا اورخود کو اللہ کے سپرد کردینا کہ وہ جو چاہے تصرف کرے تسلیم و تفویض ہے۔

سوال:۔تفویض کا فائدہ کیا ہے؟

جواب:۔تفویض کا فائدہ یہ ہے کہ خود کو اللہ تعالیٰ کے سپرد کردینا ہے اس سے وہ پریشانیوں سے محفوظ رہتا ہے کیونکہ اپنی طرف سے تجاویز قائم کرلینا پریشانیوں کی جڑ ہے۔

سوال:۔تفویض کا مقام کیونکر حاصل ہوتا ہے؟

جواب:۔تفویض کوحاصل کرنے کا طریقہ یہ ہے کہ جب کوئی خلاف طبیعت واقعہ پیش آئے تو فوراً یہ سوچے کہ یہ اللہ تعالیٰ کاتصرف اور اس کی تجویز ہے جس میں یقیناًحکمت اور مصلحت ہے اس طرح ناگوار حالات اور واقعات پر سوچتے رہنے سے اپنی طرف سے تجاویز قائم کرنے کا رجحان کمزور ہوتا جائے گا اور مقام تفویض حاصل ہوگا۔

سوال:۔کینہ کا کیا حکم ہے؟

جواب:۔کینہ رکھنا گناہ ہے ناجائز ہے، بہت بڑاعیب ہے، گناہوں کا بیج ہے بخشش میں رکاوٹ ہے۔

سوال:۔کینہ دور کرنے کا طریقہ کیا ہے؟

جواب:۔اس کو دور کرنے کا طریقہ یہ ہے (۱) جس سے کینہ ہو اس کا قصور معاف کرے (۲)میل جول کرے (۳) تحفہ بھیجتا رہے

سوال:۔دل کو بنانے اور سنوارنے والے اخلاق کون کون سے ہیں؟

جواب:۔دل کو سدھارنے والے اخلاق حسنہ بہت سے ہیں، ان میں سے چند یہ ہیں: (۱)اخلاص (۲) محبت (۳) خوف (۴) رجا (۵) تواضع (۶) زہد (۷) شکر (۸)صبر وغیرہ۔

سوال:۔اخلاص کسے کہتے ہیں؟

جواب:۔کسی بھی بات یا کام کرتے وقت اللہ کے راضی ہونے کا دھیان رکھنا، نفسانی خواہش یا غرض فاسد سے بچنا، اخلاص ہے۔

سوال:۔اخلاص کا کیا حکم ہے؟

جواب:۔اخلاص ہر نیک عمل کی مقبولیت کے لئے شرط ہے اس کے بغیر کوئی بات یا کام عنداللہ مقبول نہیں ہوتا۔

سوال:۔اخلاص کا فائدہ کیا ہے؟

جواب:۔(۱) عمل کا ثواب بہت بڑھ جاتا ہے (۲) کام میں برکت ہوتی ہے (۳) قبولیت عطا ہوتی ہے۔

سوال:۔اخلاص کے حاصل ہونے کا طریقہ کیا ہے؟

جواب:۔اخلاص یوں حاصل کیا جاسکتا ہے۔ (۱) اپنے اندر سے ریا نکال دے (۲) تکبر ختم کرے (۳) اللہ کو راضی کرنے کا ارادہ کرے (۴)اخلاص والوں کے ساتھ رہے (۵) خوب دعائیں مانگتا رہے۔

سوال:۔محبت کیا ہے؟

جواب:۔طبیعت کا ایسی طرف مائل ہونا جس میں لذت یا پسندیدگی ہو محبت ہے۔

سوال:۔محبت کی کتنی قسمیں ہیں؟

جواب:۔اجمالاً یوں کہہ سکتے ہیں کہ محبت کی دو قسمیں ہیں۔(۱) طبعی (۲) عقلی

سوال:۔محبت طبعی اور عقلی میں فرق کیا ہے؟

جواب:۔محبت طبعی غیر اختیاری طور پر متعلق ہوتی ہے اور محبت عقلی اختیاری ہوتی ہے۔

سوال:۔اللہ سے محبت کے پیدا کرنے کا کیا طریقہ ہے؟

جواب:۔اللہ سے محبت پیدا کرنے کاطریقہ یہ ہے کہ اپنے اوپر اللہ کے کیا کیا انعامات، احسانات ہیں، عطا و بخشش کے معاملات ہیں اس پر غور و فکرکرے اور ان کو صحیح استعمال کرے۔

سوال:۔اللہ کے رسول ﷺ سے محبت کیسے حاصل کی جاسکتی ہے؟

جواب:۔احسانات رسول اکرم ﷺ کو یاد کرے، سیرت نبوی ﷺ کا مطالعہ کرے، عاشقانِ الٰہی اور عاشقان محمدی کے احوال کو بار بار بزرگوں کی زبان یا صحیح کتابوں سے معلوم کرتا رہے اور محبوبان بارگاہ الٰہی سے رابطہ رکھے اور اللہ سے دعائیں کرتا رہے۔

سوال:۔خوف کسے کہتے ہیں؟

جواب:۔اللہ تعالیٰ کی ناراضگی اور آخرت میں عذاب کے اندیشوں کو پیش نظر رکھنا خوف ہے۔

سوال:۔خوف کا کیا حکم ہے؟

جواب:۔خوف ایمان کی شرط ہے اور ایمان کے دو نصفوں میں سے ایک ہے، دنیا میں خدا سے ڈرنے والا آخرت میں بے خوف ہوگا اور مامون رہے گا۔

سوال:۔خوف پیدا کرنے کا طریقہ کیا ہے؟

جواب:۔اللہ کے قہر وعذاب کو یاد کرے، اللہ نے نافرمانوں کو جو سزائیں دی ہیں قرآن وحدیث کی روشنی میں ان کا مطالعہ کرے، یا علم صحیح رکھنے والوں سے معلوم کرے۔

سوال:۔رجا کی حقیقت کیا ہے؟

جواب:۔اللہ تعالیٰ کی خاص خاص عنایتوں، یعنی رحمت، جنت، مغفرت اور عطاؤں کو حاصل کرنے کی تدبیر اور کوشش کرتے ہوئے ان چیزوں کے انتظار میں دل کو راحت پہنچانا اور پرامید رہنا رجاء ہے۔

سوال:۔رجاء کا مقام کیوں کرحاصل ہوتا ہے؟

جواب:۔اللہ کی رحمتوں، عنایتوں، احسانات کو سوچتے رہنا اور تقاضوں پر عمل کرنے سے مقامِ رجاء ملتا ہے۔

سوال:۔تواضع کسے کہتے ہیں؟

جواب:۔خود کو بلند مرتبہ کا اہل نہ سمجھنا، خود کو ناچیز جاننا اور اپنے کو دوسروں سے کمتر سمجھنا تواضع ہے۔

سوال:۔تواضع کا کیا فائدہ ہے؟

جواب:۔تواضع میں جذب اور کشش کی خاصیت ہے جن دو شخصوں میں تواضع ہوگی ان میں نااتفاقی نہیں ہوسکتی، اللہ تعالیٰ کا وعدہ ہے جو تواضع اختیار کرے گا ہم اس کو بلندی عطا کریں گے۔

سوال:۔تواضع کیسے پیدا کی جائے گی؟

جواب:۔اپنے اندر تواضع اس طرح پیدا کی جائے کہ اپنے آپ کو سب سے کمتر اور حقیر جانے اللہ تعالیٰ کی کبریائی کو ہر وقت پیش نظر رکھے اور اپنی بے بسی اور محتاجی کو سوچتا رہے۔

سوال:۔توکل کیا ہے؟

جواب:۔ہر کام میں اسباب کے ماتحت کوشش کرتے ہوئے اللہ ہی کو کارساز ماننا اور تمام کاموں میں اسی پر اعتماد کرنا (توکل) ہے۔

سوال:۔توکل کیسے حاصل کیا جائے؟

جواب:۔توکل حاصل کرنے کا طریقہ یہ ہے کہ اللہ ہی کو مسبب الاسباب جانے اسباب کو اسباب ہی کے درجہ میں رکھے، اللہ تعالیٰ کی عنایتوں اور وعدوں کا بار بار خیال کرے اور اپنی تمام کامیابیوں کو اللہ تعالیٰ کی کارسازی کا نتیجہ سمجھے۔

سوال:۔حب جاہ سے بچنے کا طریقہ کیا ہے؟

جواب:۔جب جاہ سے بچنے کا طریقہ یہ ہے کہ یہ خیال دل میں لائے کہ نہ میں رہوں گا اور نہ تعظیم و اطاعت کرنے والے اور یہ آخرت میں سخت تباہی لانے والی ہے۔سوال:۔حرص کسے کہتے ہیں؟جواب:۔دنیاوی مال و متاع کے ساتھ حد سے زیادہ دل کے مائل اور مشغول ہونے کو حرص کہتے ہیں۔

سوال:۔حرص سے کیا نقصان ہے؟

جواب:۔حرص تمام بیماریوں کی جڑ ہے اسی کی وجہ سے تمام جھگڑے اور فساد ہوتے ہیں، اگر حرص نہ ہو تو کوئی کسی کا حق نہیں دباتا۔

سوال:۔حرص کو ختم کرنے کا طریقہ کیا ہے؟

جواب:۔خرچ کو گھٹانا، تھوڑے پر اکتفا کرنا آئندہ کی غیر ضروری فکر نہ کرنا اور یہ سوچتے رہنا کہ حریص ذلیل ہوتا ہے۔

سوال:۔بخل کیا ہے؟

جواب:۔نیک کاموں میں اور واقعی ضرورت کے موقع پرخرچ کرنے سے رک جانا اور رکاوٹ کا پایا جانا بخل ہے۔

سوال:۔بخل کا سبب کیا ہے؟

جواب:۔بخل کا سبب مال کی محبت اور لمبی لمبی امیدیں ہیں۔

سوال:۔بخل میں کیا خرابی ہے؟

جواب:۔بخل مال کی محبت سے پیدا ہوتا ہے اور مال کی محبت دل کو دنیا کی طرف متوجہ رکھتی ہے اور ذکر و فکر سے غافل کردیتی ہے جس سے اللہ کی محبت کا تعلق کمزور پڑجاتا ہے، بخیل مرتے وقت اپنا جمع کیا ہوا مال دیکھ کر پچھتاتا ہے قیامت کے دن بخیل کا مال آگ کا طوق بناکر اس کے گلے میں ڈال دیا جائے گا۔

سوال:۔بخل سے بچنے کا طریقہ کیا ہے؟

جواب:۔اللہ کی دی گئی وعیدوں پر خوف کھائے اور مال خرچ کرنے کی فضیلت اور نتیجہ کو سمجھے وعدوں پر یقین رکھے۔

سوال:۔حسد کسے کہتے ہیں؟

جواب:۔کسی شخص کی اچھی حالت کا ناگوار گزرنا اور یہ آرزو کرنا کہ اس کی یہ اچھی حالت زائل ہوجائے حسد کہلاتا ہے۔

سوال:۔حسد کیسی برائی ہے؟

جواب:۔حسد بخیلی سے بھی کہیں بڑی برائی ہے، حسد حرام ہے اس سے دین اور دنیا دونوں کا نقصان ہے۔ حسدنیکیوں کو اس طرح کھاجاتا ہے جس طرح آگ سوکھی ہوئی لکڑیوں کو جلاکر ختم کردیتی ہے۔ اللہ تعالیٰ اپنے خزانۂ قدرت سے کسی کو مال، کسی کو علم، کسی کو رتبہ، کسی کو شہرت و مقبولیت اورکسی کو کوئی اور نعمت دیتے ہیں۔ حاسد اس فکر میں لگا رہتا ہے کہ یہ نعمتیں دوسرے شخص کے پاس سے چھن جائیں۔ یہ دوسرے معنوں میں اللہ پر اعتراض ہے کہ یہ چیزیں اس کو کیوں ملیں مجھے کیوں نہیں ملیں۔ ظاہر ہے کہ اس طرح کے جذبات و احساسات سے اس کا دین اور آخرت تو برباد ہوتی ہی ہے ساتھ میں دنیا کا بھی نقصان ہے۔ حسد کی آگ اس کو اندر ہی اندر گھلادیتی ہے اور رنج و غم میں مبتلا کرتی رہے گی۔

سوال:۔مرض حسد سے بچنے کی تدبیر کیا ہے؟

جواب:۔(۱)جس سے حسد ہو اس کی خوبیاں بیان کریں (۲) اس کے ساتھ احسان کریں (۳) تواضع سے پیش آئیں (۴) سب کی خوشی و غم میں برابر کے شریک رہیں۔

سوال:۔غصہ کی حقیقت کیا ہے؟

جواب:۔کسی سے ناراض ہوکر بدلہ لینے کے لئے طبیعت کا جوش میں آنا غصہ ہے۔

سوال:۔غصہ کا کیا حکم ہے؟

جواب:۔بے محل غصہ حرام ہے غصہ ایمان میں بگاڑ ڈالدیتا ہے، جیسے ایلوا شہد کو بگاڑدیتا ہے، غصہ پینے والے محسن اور خدا کے محبوب ہوتے ہیں، غصہ کے وقت اپنے کو قابو میں رکھنے والے کو حضور ﷺ نے بہادر اور پہلوان بتلایا ہے۔ ویسے غصہ کے مراتب اور درجات کی بہت سی تفصیل ہے یہاں ان تمام تفصیلات کی ضرورت نہیں۔

سوال:۔غصہ کا کیا علاج ہے؟

جواب:۔غصہ کا علاج یہ یاد کرنا ہے کہ ارادۂ خداوندی کے بغیر کچھ نہیں ہوتا اگر میں نافرمانی کروں اور اللہ تعالیٰ مجھ سے بھی یہی معاملہ کرے تو کیسا ہوگا اور اللہ تو سب سے زیادہ قدرت رکھنے والے ہیں۔

سوال:۔کینہ کسے کہتے ہیں؟

جواب:۔بدلہ لینے کی قوت نہ ہونے کی وجہ سے دل پر ایک خاص قسم کی گرانی اور بوجھ ہوتا ہے اور دل میں کدورت جم جاتی ہے اس کو کینہ کہتے ہیں۔

سوال:۔حب دنیا کو دل سے کیسے نکالا جائے؟
جواب:۔حب دنیا کو دل سے نکالنے کا طریقہ یہ ہے کہ دنیا کا فانی اور عارضی ہونا بتلایا جائے اور آخرت کی لازوال اور باقی زندگی کو سمجھا یا جائے، موت کی یاد دلائی جائے۔
سوال:۔دل سے تعلق رکھنے والے برے اخلاق کونسے ہیں؟
جواب:۔دل سے تعلق رکھنے والے چند برے اخلاق یہ ہیں (۱) تکبر (۲) ریا (۳)عجب (۴) حسد (۵) غصہ (۶) کینہ (۷)حب جاہ (۸) حب مال (۹)حرص (۱۰) بخل

سوال:۔تکبر کی حقیقت کیا ہے؟

جواب:۔اپنے آپ کو صفات و اعمال میں دوسروں سے بڑھ کر سمجھنا تکبر ہے۔

سوال:۔تکبر میں کیا نقصان ہے؟

جواب:۔تکبر حرام ہے بہت بڑا اور بہت برا مرض ہے تکبر ہی سے کفر پیدا ہوتا ہے اور تکبر ہی کی وجہ سے شیطان گمراہ ہوا۔

سوال:۔تکبر کو کیسے دور کیا جائے؟

جواب:۔اللہ کی عظمت اور بڑائی یاد کرے، اپنی خوبیاں اور کمالات بے حیثیت نظر آئیں اور کے ساتھ تواضع اور تعظیم سے پیش آئیں اور ہر شخص کا اکرام کرے اور اُسے اپنے سے بہتر سمجھے۔

سوال:۔عُجب کیا ہے؟

جواب:۔اپنی خوبیوں کو اپنی ذاتی سمجھنا اور ان کو اپنی طرف منسوب کرنا اور اپنے پاس کے کمالات پر ناز کرنا عجب ہے اس کا دوسرا نام خود پسندی ہے۔

سوال:۔عجب کا کیا حکم ہے؟

جواب:۔عجب بری چیز ہے بچنا لازم ہے۔

سوال:۔عجب کی نشانیاں کیا ہے؟

جواب:۔عجب کی چند نشانیاں اور علامتیں یہ ہیں (۱) اپنی تعریف کرنا (۲) اپنی تعریف کئے جانے کو پسند کرنا (۳) مجمع میں پہلی اور خصوصی جگہ پر بیٹھنا (۴) راستے میں لوگوں کے آگے شان سے چلنا (۵) نصیحت کرنے پر ماننے سے گریز کرنا (۶) دوسروں کو نصیحت کرنے میں سختی کرسے پیش آنا (۷) لوگوں کو حقارت کی نظر سے دیکھنا (۸)خود کو دوسروں سے بہتر سمجھنا۔

سوال:۔عجب کو دور کرنے کا طریقہ کیا ہے؟

جواب:۔خود پسندی کو دور کرنے کی تدبیر یہ ہے کہ اپنے پاس نظر آنے والے کمالات اور خوبیوں کو عطائے خداوندی سمجھے اور قرآن کی آیت فلا تزکوا انفسکم پر غور کرے جس میں اپنے کو پاکیزہ بتانے سے منع کیا گیا ہے اور خاص طور پر یہ دھیان رکھے کہ بہتر شخص وہ ہے جو اللہ کے یہاں بہتر ہے اور اللہ کی قدرت کو یاد کرے اور ڈرے کہ کہیں یہ نعمت سلب نہ ہوجاے۔

سوال:۔ریا کیا ہے؟

جواب:۔اپنے علم کا یا اپنے عمل کا ایسا دکھاوا جس کے ذریعہ لوگوں کے دلوں میں اپنی عزت اپنی مقبولیت اور اپنے مرتبہ کی خواہش ہو یہ ریا ہے۔

سوال:۔ریا کی علامتیں کیا ہیں؟

جواب:۔ریا کی بہت سے علامتیں ہیں ان میں سے چند یہ ہیں (۱) اپنی عبادتوں کا چرچا کرنا(۲) اپنے ذِکر کا شہرہ کرانا (۳) تلاوت قرآن پاک کے بارے میں بھی اسی طرح کا جذبہ رکھنا(۴) بغیر بتائے معلوم ہوجانے پر خوش ہونا (۵) کوئی عزت نہ کرے تو غصہ ہوجانا (۶) مجلس میں آنے سے نہ اٹھنے پر غصہ کرنا (۷) برا سلوک کرنے پر دل میں تنگی کا پایا جانا یہ سب باریک باریک علامتیں ہیں۔

سوال:۔ریا کا کیا حکم ہے؟

جواب:۔ریا حرام ہے بلکہ شرک اصغر ہے ، پوشیدہ شرک ہے، چیونٹی کے رینگنے کی سرسراہٹ سے زیادہ دبے پاؤں آتا ہے عبادات کے مقصود کے خلاف ہے۔

سوال:۔ریا سے بچنے کا طریقہ کیا ہے؟

جواب:۔جو نیکی کے کام اور عبادتیں اجتماعی نہیں ہیں اس کو پوشیدہ کرنا اوراس کا چرچا نہ کرنا اور یہ سوچتے رہنا کہ یہ چیز اخلاص کے خلاف ہے اور اعمال کو غارت کرنے والی ہے۔

سوال:۔حب جاہ کیا ہے؟

جواب:۔لوگوں کے دلوں کو موہ لینے کی خواہش ہے کہ لوگ اطاعت کریں اور تعظیم کے ساتھ پیش آئیں۔

سوال:۔جب جاہ میں کیا خرابی ہے؟

جواب:۔حضورﷺ کا ارشاد ہے دو بھوکے بھیڑئیے بکریوں کے گلے میں چھوڑدئیے جائیں تو وہ اس گلے (ریوڑ) کو اتنا تباہ نہیں کرتے جتنا آدمی کو حرصِ جاہ اور مال اس کے دین کو تباہ کردیتی ہے۔